خوش رہو ریمنڈ ڈیوس

اگر ایک تھانے کے ایس ایچ او سے لے کر ملک کے صدر تک تمام بضد ہوں کہ تین بے گناہ پاکستانیوں کے خون کی قیمت زبانی کلامی معافی تلافی یا پھر سفارتی استشناء سے بڑھ کر کچھ نہیں تو پھر ریمنڈ اور اس کے ہموطنوں کی جانب سےمقتولین کے ورثاء کے لئے ۳۷ کروڑ کی دیت،ان کی آنے والی نسلوں تک کے لئے تعلیم و روزگار سب کچھ کا وعدہ، ہر متاثرہ خاندان کے دو افراد کے لئے خوابناک امریکی گرین کارڈ کی فراہمی وغیرہ وغیرہ وہ انعامات ہیں جس کے لئے ہم امریکہ کے شکر گزار ہی نہیں احسان مند بھی ہیں۔ اب اگر کوئی لاکھ کہے کہ ملکی حمیت کا کیا ہوا، دنیا میں باوقار اور سر اٹھا کر جینے کی موہوم پاکستانی خواہش کیسے قربان ہوئی یا اس امریکی اٹارنی کے دعوے کہ پاکستانی دس ڈالر کے لئے اپنی ماں کو بھی بیچ سکتے ہیں ، پر مہر تصدیق ثبت کرنے اور دنیا بھر میں جگ ہنسائی کا سامان کرنے کا شرمناک فعل کیسے انجام پایا تو یہ سب ثانوی باتیں ہیں جن کا مفاد کے تابع رہنے والے مادہ پرستوں کو کوئِی سروکار نہیں۔ حیرت تو بجا ہے مگر واقعہ حیران کن ہرگز نہیں۔ ڈالروں کے لئے اپنی غیرت و حمیت کی جو سوداگری نوازشریف نے ایمل کانسی کو امریکہ کے حوالے کر شروع کی تھی اور جسے سابقہ ڈکٹیٹر پرویز مشرف نے نئی جہتوں سے روشناس کرایا تھا، اب اس بدقسمت پاکستانی قوم کے ماتھے پر لگا کلنک کو وہ ٹیکا ہے جو رہتی دنیا تک ہر خاص وہ عام میں ہمارے تعارف کا باعث ثابت ہو گا۔

دنیا نے کبھی ہمارے ایک قوم یا ملت ہونے کے دعوے کو دیوانے کی بڑ سے زیادہ اہمیت نہیں دی اور ہم نے بھی نہیں چاہا کہ ہماری پہچان ایک حقیقی قوم کی حیثیت سے ہو جس کی غیرت اس کی خواہش نفس سے بڑھ کر اور ضروریات زندگی سے ماورا ہوتی ہے۔ ہم تو سنگاپور کی اس شہری ریاست سے بھی گئے گزرے ہیں جس نے ہر قسم کے امریکی دبائو کو جوتے کی نوک پر  رکھا اور نہ صرف گرفتار امریکی کو ٹرائل کیا بلکہ عدالت سے دی گئی سزا کو بھی نافذ کر کے دکھایا۔ مگر سنگاپور اور پاکستان میں فرق بھی تو بہت ہے، وہ ایک چھوٹے سے شہر پر مشتمل ملک ہے جس کی زیادہ زیادہ چوڑائی ۲۸ میل اور کل رقبہ ۷۱۰ مربع کلومیٹر جبکہ پاکستان لاکھو ں مربع کلومیٹر رقبے پر مشتمل دنیا کی واحد اسلامی ایٹمی طاقت ہے جس کی ۱۱ لاکھ  ریگولر اور پیراملٹری فورس دنیا کی چھٹی بڑی قوت سمجھی جاتی ہے ۔ اگر دیکھا جائے تو اتنی بڑی فورس ہی ہمارے بہت سے مسائل کی بنیادی وجہ ہے، ریمنڈ کا معاملہ بھی جب تک سیاسی قوتوں کے ہاتھوں میں رہا، وہ گرفتار بھی ہوا، عدالت میں پیش بھی ہوا ، اس کا ریمانڈ بھی دیا گیا اور اسے جیل میں بھی ڈالا گیا مگر جوںہی ہماری مقتدرہ ایجنسیاں اس میں ملوث ہوئیں آلہ دین کے چراغ کے جن مانند سب کچھ لمحوں میں بدلا اور ریمنڈ کے بارے ہمیں تب پتہ چلا جب وہ باگرام ایئر بیس پر پہنچ چکا تھا۔

ہم یہ کہہ کر اپنی جان چھڑا سکتے ہیں کہ یہ ہماری قسمت کا لکھا ہے مگر ہم اس الزام سے کیسے بچ پائیں کہ یہ قسمت ہم نے خود ہی تو تخلیق کی ہے